إبراهيم عيسى

فيديو .. إبراهيم عيسى: عدد شهداء ثورة 25 يناير هو 36 فقط

أخبار ليل ونهار – في مرافعة إعلامية لإثبات براءة الرئيس المخلوع حسني مبارك قال الإعلامي إبراهيم عيسى إن عدد من استشهدوا في الميادين في ثورة 25 يناير هو 36 شهيدًا فقط، فيما أوضح أن ضباط الشرطة كانوا سيدانوا إذا لم يطلقوا النار على «المعتدين على أقسام الشرطة».

وأوضح «عيسى»، في برنامجه 25/30، مساء الاثنين، قائلًا: «هو كام عدد المتظاهرين اللي ماتوا؟ كام شهيد سقطوا؟ ده يرجع بينا لإحصائية مهمة جدًا قدمتها المحكمة وتردلنا على كل الأسئلة، من لديه عقل فالينصت وينتبه بعقله».

وتابع: «إحنا طول الوقت بنقول حق الشهداء، حق الشهداء ده يستدعي إن احنا نعرف انهم شهداء، ثم نعرف هم مين، وحقهم بالمناسبة مش في التعويضات لأهاليهم، حقهم إن بلد يبقى فيها عدالة».

واستطرد: «طيب ودم الشهداء، خلينا نوضح النقطة دي، أنت معتبر اللي راحوا هاجموا الأقسام واعتدوا عليها، أو مدريات الأمن أو السجون، معتبرهم ثوار يعني؟ ومن ثم رايح يحرق ويقتحم ويسرق ويضرب بالرصاص أقسام الشرطة، عايز تعتبره ثوري، اللي بيعتبروا دول ثوريين أظن مشيوا، اللي بيتفرجوا علينا دلوقتي اللي رأيهم إن دول مش ثوار».

وأضاف «عيسى»: «وبنتكلم على من يوم 25 ليوم 31، دول اللي كانت فيها الشرطة موجودة، وكان فيها حبيب العادلي، كم عدد القتلى؟ خليني أتكلم دلوقتي قتيلًا عشان أتكلم بعد كدة على شهيدًا، اللي المحكمة، بناءًا على كل الأدلة والوثائق والمستندات، وبناءًا على كل الإحصائيات والدعاوى المرفوعة وإحصائيات المستشفيات.. إحنا قصاد عدد 239 قتيل».

وأكمل مقدم برنامج 25/30: «تعالى نفنطهم زي ما المحكمة فنطتهم كدة، قالت ايه في صفحة 127، قالت في 5 بعد يوم 31 اللي هم بعد حبيب العادلي ما مشي ومفيش شرطة أصلًا، فهنخرجهم برة الموضوع، في 103 من المعتدين على أقسام الشرطة، دول اللي 9 محاكم في مصر برأت الضباط المتهمين فيها منهم 6 أحكام نهائية و3 حكم بات يعني من النقض وكلهم في فترة محمد مرسي، بمعنى إن دول كانوا بيدافعوا عن أقسام الشرطة، لو مكانوش ردوا بالرصاص يبقوا مدانين هم أصلًا، كانوا بيدافعوا عن نفسهم لأنه كان بيتقتلوا».

ولفت: «95 حالة اتجابت من الثلاجات، من المشارح، لا فيها هي ماتت إمتى ولا فين ولا إيه سبب الإصابة ولا في أنهي مكان ولا الرصاص ده منين، ولا فيه رصاص ولا لا، 95 ماتوا في الفترة من 25 يناير لـ31 يناير، بس فين؟ ماتوا ازاي؟ مافيش، فخرجتهم (المحكمة) منعرفش هنوديهم فين».

واختتم: «فضلنا كام؟ فضلنا 36 واحد فقط ماتوا استشهدوا في 10 محافظات في الـ6 أيام دول، 36 واحد من أبناء مصر من شباب مصر، زي ما كلهم حتى اللي ماتوا قصاد الأقسام طبعًا، وده لا يمكن بأي حال من الأحوال أقول عليه إلا ده توصيف، عشان نعرف نتكلم عن إيه، بنتكلم عن مين وبنتكلم عن إيه، وأنا كما ذهبت المحكمة وكما استجاب الرئيس اليوم، في فكرة التعويضات وتبريد قلوب الناس، لكن ده مش معناه إن القتلى في الميادين، هم 36 واحد، ياكش نعوض مليون، إنما اللي في الميادين 36 واحد» .. شاهد الفيديو:

اضف تعليق للنشر فورا