حركة 6 إبريل

خواطر عضو من حركة 6 ابريل

أخبار ليل ونهار – مع حلول الذكرى الثامنة لتأسيس حركة 6 ابريل، بدأت الحركة عبر صفحتها الرسمية على موقع التواصل الإجتماعي فيس بوك، بنشر «خواطر عضو من حركة 6 ابريل» وأقوال قيلت عن الحركة.

حيث جاءت أول الخواطر كالتالي:

« 6ابريل … فكرة … مش مجرد كيان أو تنظيم..فكرة بدأت لما أدركت ان ليا دور فى الدنيا دى وليا رأى ووجهة نظر … مع تفتح وعيى وادراكى للصواب والخطأ..ادراكى لفساد وفشل المنظومة الحاكمة للمجتمع … مش بس مجرد فساد النظام السياسى … الأفكار .. القيم .. العادات والتقاليد البالية الموروثة والمستقرة ف الوعى الجمعى .. (امشى جنب الحيط ومتتكلمش ف السياسة..اسمع كلام الحاكم ورجل الدين حتى لو غلط..الولد أحسن من البنت …خليك ف حالك واخضع للمنظومة ومتتكلمش….فكر ف حياتك وبس واتجوز وخلف وعيش زى باقى القطيع مهتم بس بحياتك اليومية وتفاصيلك الصغيرة…وغيرها وغيرها).

6 ابريل هى وسيلتى انى مش بس انتقد كل دا … وسيلتى انى احاول أغيره … أحاول أقدم النموذج ..اكسر القاعدة وأكسر حاجز الخوف… 6 ابريل علمتنى ان ليا رأى وليا صوت ومن حقى أعبر عنه .. حتى لو كنا مليون أو ميت الف او الف او حتى شخص واحد..6ابريل علمتنى مخافش واقف للظالم فى وشه ..حتى لو كان الحاكم او رجل الدين … علمتنى انه منع الافكار مش ممكن ومحدش يقدريمنعها توصل للناس … وانه ينفع نلاقى طريقة نعيش بيها فى مجتمع واحد من غير ما نقتل بعض عشان اختلافات الدين او الفكر او السلوك وطريقة الحياة …. علمتنى انى ممكن أفكر واحلم وادافع عن حلمى وافكارى … حتى علمتنى انى ممكن أجرب وأغلط لانى بشر ومش ملاك …. علمتنى انه فيه قيمة للى بعمله .. ممكن اثارها متظهرش دلوقتى انما أكيد اللى بعمله قيم فى ذاته لانى بمارس حقى…حقى فى التفكير والتعبير …حقى انى اكون انسان

خواطر عضو من حركة 6 ابريل».

كما قامت 6 ابريل بنشر مقولة من الإعلامى حمدى قنديل عن الحركة .. شاهد الصورة:

اضف تعليق للنشر فورا