عمرو اديب

بالفيديو .. اديب: هيحصل حرب اهلية في مصر قريب

اخبار ليل ونهار – توقع الإعلامي عمرو أديب، في برنامجه «القاهرة اليوم»، نشوب حرب أهلية في مصر قريبا.

وأوضح «أديب»: «في حاجة خطيرة أنا ملاحظها أوي بقالي أسبوع، 10 أيام فاتت، وأنا بحب الكلام من الآخر، يتحدث البعض الكثير عن ثورة جديدة إن مصر هيحصل فيها ثورة جديدة، وإنه الشعب مش هيسكت، والشعب هيثور، الشعب بتاع، حاجات كدة وكلام هنا وهنا، زي ما وسائل الاتصال، بعض النشطاء، ثورة جديدة، ماشي».

وأضاف: «أنا بس عاوز أقول لحضراتكم حاجة، إنه المرة الجاية، ده توقعي أنا، وأرجو إن يعني حضراتكم ماتخدونيش بخفة، المرة الجاية مصر مش هيبقى فيها ثورة، المرة الجاية مصر لو سبنا الدنيا تقع هيبقى فيها حرب أهلية، ستشهد مصر أول حرب أهلية في تاريخها، خلاص البلد مش حمل ثورات، إنما البلد هيكون فيها ما خلاص محدش مستحمل، لا دول مستحملين ولا دول مستحملين، محدش مستحمل الكلام ده، الناس هتنزل لبعض في البلد».

وتابع: «يعني اللي عايز يهزها اليومين دول أو اللي عايز يجيب عاليها وطيها أنا بقول له الآتي، دائمًا اللي عايز يعمل ثورة ده بيبقى بيهز الشجرة عشان التفاحة تنزل في حجره، يعني الإخوان كانوا بيهزوا الشجرة جامد جدًا 25 يناير عشان التفاحة تنزل في حجرهم، ونزلت في حجرهم فعلًا، خدوا التفاحة ومسحوها وبتاع، قبل ما يأكلوها كانت وقفت في زورهم أصل تفاحة مصر صعبة، محدش يبلعنا، مفيش تنظيم يبلع دولة، ولأن دي دولة قوية، ولأنه بيجري أشياء كثيرة هامة على الأرض».

واختتم: «أنا بقول بس للناس اللي بتحاول لأنه خدوا بالكوا التبسم بتاع جهات كثيرة حولينا، اللي هو أنت عايز إيه هديهولك، أهلًا وسهلًا اتفضل، مش عارف إيه، كل ده في الوش مش عارف إيه وفي الظهر إيه، عارفين أنتوا المثل، المؤامرة موجودة لسة، وطلب تقسيم الدولة المصرية مازال على المنضدة، مش وهم، أظن الأشياء حضراتكم شفتوها، شفتوا العراق».

https://youtu.be/Xea3I8ZwC7I?t=24m7s

3 تعليقات على “بالفيديو .. اديب: هيحصل حرب اهلية في مصر قريب

  1. منتهى الوساخة.. حتى والاعلام الفاسق قرب يقع ويقفل ويفلس.. برضه مازال يحرض الناس ويؤلب الشعب على بعضه.. الحكاية ان الثورة هتقوم على الظالمين وهما معروفين كويس.. وعلى المحرضين اللي هما انتم وكل الفضائيات النتنة … صبرا صبرا….

  2. المصريون شعب هُزُؤ لا كرامة له ولا مبدأ…لذا فهم يستحقون أسوأ بكثير مما هو واقع بهم

اضف تعليق للنشر فورا