قطر، علم قطر، الدوحة

باحث سياسي يكشف مفاجأت مذهلة بين مصر وقطر

اخبار ليل ونهار – في مفاجأة مذهلة، قام الدكتور ياسر نجم – الناشط والباحث السياسي – بعقد مقارنة بسيطة بين مصر وقطر، كشفت عن تفوق قطر في جميع المجالات سواء الاقتصادية او العلمية او الاجتماعية او الصحية وخلافه.

وقال نجم في تدوينة: “تعرف ان فيه 180 ألف مصري قرروا يطفشوا من مصر ويعيشوا في قطر..وفيه 18 مليون يتمنوا بس لو تتح لهم الفرصة…بينما القطريين اللي عايشين في ماسر عددهم 500 نفر بمن فيهم البعثة الدبلوماسية وعائلاتها…؟”.

ياسر نجم
ياسر نجم

وأضاف:  “تعرف انه فيه حاجه اسمها مؤشر التعليم…قطر سابقة مصر فيه بـ 79 مركز..وان قطر متفوقة في مستوى التعليم على دول بحجم روسيا والصين وتركيا والبرتغال والأرجنتين…بينما مصر سابقاها دول زي بوتسوانا وتونجا وسيريلانكا وموريشيوس وسورينام..وان قطر الأولى على الدول العربية بينما فيه 12 دولة عربية سابقة مصر في التعليم..بما فيهم فلسطين المحاصَرة؟”.

وفجر مفاجأة قائلاً: “تعرف ان قطر انتقلت رسمي بالفعل من الدول النامية للدول ذات الإقتصاديات المتقدمة…وان الموضوع مش بس له دعوة بأنهم دولة بترولية..لأن جارتهم البترولية برضه البحرين مازالت معاك في فئة الدول النامية…؟”.

وقال: “تعرف انه فيه حاجه اسمها مؤشر السلام العالمي..بيقيم كل دولة بناءا على حجم العنف والصراعات والجرايم وتدهور الأمن والأمان فيها..وان قطر ترتيبها ال22 على الدول الأفضل في المجال ده..ومصر ترتيبها ال143…ومجموع الدول اللي في التقييم 162 دولة..؟ .. قطر متفوقة في التقييم ده على بريطانيا وأمريكا وفرنسا وأسبانيا.. بينما ليبيا أحسن من مصر في التقييم ده… أى والله”.

وتابع: “تعرف ان فيه مقياس للصحة اسمه (العمر المتوقع) بيحدد العمر المتوقع للمواطن في كل دولة على حسب تطور الرعاية الصحية… وان عمر المواطن اللي عايش في مصر مقصوف بمقدار سنتين و3 شهور مقارنة بالمواطن اللي عايش في قطر..؟، علماً بأن سورية سابقة مصر في المقياس ده”.

وقال: “تعرف ان فيه مقياس اسمه مقياس (السعادة العالمية)…وان قطر ترتيبها ال27 طبقاً للمقياس قبل دول زى اليابان وأسبانيا وايطاليا..بينما مصر ترتيبها ال130..وان المواطن المصري أبأس وأتعس من معظم سكان قارة افريقيا ؟”.

واستكمل: تعرف ان قطر ضمن ال30 دولة الأكثر شفافية والأقل فساداً في العالم (ال26)..وانها التانية عربياً فى المجال ده..بينما مصر ال94 على العالم والعاشرة عربياً..؟ “بحسب ما اورده من معلومات”.

وأنهى نجم كلامه قائلاً: “طب مش عاجبك كل ده…ومالكش في الحقائق العلمية وبتعتقد ان كل العالم متآمر على مصر.؟! بلاش…. انزل امشي في الشارع وكلم واحد في قطر ماشي في الشارع…وكل واحد فيكم يقول للتاني هو شايف ايه… أو اطلع خلص مصلحة في هيئة حكومية وخللي واحد في قطر يقول لك بيخلصها ازاي”.

تعليق واحد على “باحث سياسي يكشف مفاجأت مذهلة بين مصر وقطر

  1. يا خسارة يا مصر… اللي قالوا الدكتور ياسر صحيح تماما.. كفاية انك تمشي في شوارع مصر وتبص في وجوه المواطنين علشان تعرف حجم المأساة اللي بيعيشها المواطن المصري.. كفاية انك تمشي في حواري القاهرة وتشوف مدى الاهمال فيها والزبالة اللي مركونة في كل مكان.. كفاية الأسعار اللي بتزيد يوم عن يوم.. كفاية مأساة المواطنين في طوابير البحث عن انبوبة غاز في هذا الجو القارس… وحكومة الانقلاب ودن من طين والأخرى من عجين… القبضة الأمنية خنقت الناس…

اضف تعليق للنشر فورا