علم امريكا، الولايات المتحدة الامريكية

الهجرة الى امريكا .. معلومات هامة قبل السفر الى امريكا

اخبار ليل ونهار – الهجرة الى امريكا .. معلومات هامة قبل السفر الى امريكا

خلاصة خبرة احد الشباب المصري “مصطفى الحسيني” الذي سافر الى امريكا للعمل فيها ، ويحكي بنفسه هذه المعلومات الشيقة عن المجتمع الامريكي :

1- الأمريكان شعب طيب في أغلبه وبيتقبل المهاجرين بسهولة، خاصة في الولايات متعددة الجنسيات والأعراق زي نيويورك ونيوجيرسي والينوي وميتشجان وكاليفورنيا على سبيل المثال

2- فيه نسبة عنصرية موجودة في بعض الولايات اللي بتقع في الجنوب وفي الغرب وأشهرها الميسيسبي ونورث كارولاينا وكنتاكي ويوتاه وتكساس ” عدا مدينة هيوستن ” وبعض الولايات اللي مفيهاش تعددية عرقية كبيرة، فممكن يحصل فيها بعض الإنتهاكات الخفيفة على المستوى الفردي

شاهد ايضا

انواع تأشيرات السفر الى امريكا

3- أي انتهاك عنصري حتى لو خفيف تجاه الدين أو العرق أو الجنس مرفوض تماماً ويعاقب عليه القانون وبشدة، كما أن المجتمع يرفضه بشكل واضح

4- محدش بيسخر من لكنتك أو كلامك حتى لو الإنجليزي بتاعك تعبان جداً، أكتر حاجة ممكن حد يعملها لو مش عايز يرد عليك انه يعمل انه مش فاهم انت بتقول ايه، لكن غالباً ده مابيحصلش والناس بتحاول تساعد أي حد في الشارع حتى لو بيتكلم انجليزي بصعوبة

5- انسى الحاجات اللي سمعتها طول حياتك عن أمريكا لو ناوي تيجي هنا، مثلاً يعني مش هتلاقي هنا منتج بيبسي إلا نادراً، لأن كوكاكولا مكتسحة البيبسي في كل مكان، ولو سألت على بيبيسي أو أحد منتجاته زي سفن أب مثلاً هتبقى مكسوف وانت بتسأل لأن غالبية الناس مابتشوفهوش غير في الإعلانات، برضه السيارات الأمريكية هنا مش مكتسحة السوق كما تظن، ناس كتير بتفضل السيارات اليابانية لأنها موفرة بالنسبة ليها، ده رغم ان السيارات الأمريكية في الغالب أرخص من اليابانية، لكن بالمجمل السيارات الأمريكية واليابانية بتتنافس سنوياً على صدارة السوق الأمريكي، كمان لازم تعرف إن مش كل الأمريكان أغنياء، انسى الكلام ده، شوارع نيويورك ولوس أنجلوس مليانين بالمشردين اللي بيناموا في الشوارع

6- مسمهوش الخليج العربي إسمه الخليج الفارسي، أيوة أنت قرأت صح، محدش هنا بيقول الخليج العربي أصلاً، إسمه في كل مكان الخليج الفارسي، وعامة غالبية الأمريكان يعرفوا دول الخليج على أنها مجموعة دول غنية جداً وعندها فلوس مش عارفة توديها فين

شاهد ايضا

بالصور .. اجراءات الحصول على الفيزا الامريكية خطوة بخطوة

7- إنسى حوار إن البنات الأمريكيات بيحبوا الراجل الشرقي أو المصري، مفيش الحوار ده، ده كان زمان وخلص أو كان حلم وانتهى، الناس هنا هتحبك علشان انت كوول وظريف وبس، وهتحترمك علشان شخصيتك مش علشان شكلك ولا لون بشرتك

8- كل حاجة في أمريكا قايمة على رقم السوشيال سيكيورتي، اللي هو الرقم الوطني، من غيره هتتبهدل ومش هتعرف تعمل حاجة، ولو مش معاك هتعيش طول عمرك عالهامش، ومش هتعرف تشتغل شغلانة حلوة

9- أمريكا سهل تعمل فيها فلوس كتير وبسرعة، لكنها برضه مش جنة، الميزة هنا أنها أرض الفرص المتساوية للجميع، الكل عايش وفق ضوابط واحدة وده هيسهل عليك تنجح لو اشتغلت بجد، خاصة اننا احنا العرب جايين من دول كنا بنشتغل فيها بالعشرين ساعة في اليوم علشان مجرد تلاقي أكل، لو اشتغلت نصهم هنا وشغلت دماغك شوية هتعمل فلوس كويسة جداً

10- امريكا تعتبر قارة، مثلاً المسافة بين نيويورك في الساحل الشرقي ولوس أنجلوس في الساحل الغربي حوالي ست ساعات ونص بالطائرة، أيوة ست ساعات ونص في الطيارة وأنت لسه جوة أمريكا، علشان كدة هتلاقي ولايات كتيرة فيها أراضي شاسعة جداً وناس قليلة ومنازل أقل

11- الأمريكان في أغلبهم مايعرفوش كتير خارج حدود الولاية اللي ساكنين فيها، ومش مهتمين بباقي العالم كله، حتى مش مهتمين بسياسات أمريكا الخارجية أو الداخلية، ولأن عندهم الآف القنوات التلفزيونية المحلية جداً وأقصد هنا القنوات اللي خاصة بالمقاطعات والمدن مش بالولايات كمان، فتلاقي معرفتهم شبه مقصورة بالمكان اللي هما عايشين فيه مش أكتر ولا أقل، وهتلاقي كتير أمريكان مايعرفوش أي شيء عن الثقافات المختلفة أو حتى البلدان القريبة منهم زي كندا مثلاً، بل كمان ممكن تندهش لما تلاقي كمية الناس اللي مش عارفة أسماء عواصم ومدن الولايات الأخرى

12- نسبة العرب ” أو اللي أصلهم عرب ” في أمريكا تقترب من ثلاثة ونص مليون نسمة، لكنهم غير مؤثرين تماماً، لا يوجد لهم لوبي وليس لديهم ثقل سياسي أو إجتماعي رغم كونهم ناجحين على المستوى الشخصي فمثلاً حوالي 61% منهم معاهم شهادات علمية عليا كالطب والهندسة والصيدلة، كمان ليهم حضور طاغي في المهن الحرة والإستثمارات الناجحة، برضه متوسط دخل الأُسر الأميركية من أصل عربي يتجاوز 54 ألف دولار سنوياً، وهو رقم ممتاز إذا عرفت أن مستوى دخل الأسر الأميركية الأخرى بيكون في المتوسط 43.6 ألف دولار سنوياً، ورغم كل النجاحات دي على المستوى الشخصي إلا أنهم على مستوى العمل الجماعي مش منظمين ومش مؤثرين

13- نسبة المسلمين في أمريكا تقترب من الثمانية مليون نسمة، ليهم حضور كويس لكنه برضه مش قوي لنفس الأسباب السابقة ” عدم تجمعهم بشكل كويس أو ممنهج وعدم وجود لوبي إجتماعي يضم أغلب المنظمات الإسلامية زي ” كير واسنا واكنا وماس “، أغلب المسلمين الأمريكان من السود، لكن الإسلام بينتشر بسرعة داخل المجتمع الأبيض

14- عدد سكان أمريكا ككل حوالي 308 مليون نسمة في مساحة ارض كبيرة جداً تبلغ مساحتها حوالي عشرة مليون كم مربع، علشان كدة أمريكا محتاجة عمالة بشكل دائم، وده يرجعنا لمشكلة المهاجرين غير الشرعيين واللي أمريكا بتعتمد عليهم كعمالة رخيصة، عدد المهاجرين غير الشرعيين اللي موجودين جوة أمريكا حوالي عشرة ونصف مليون مهاجر غير شرعي أغلبهم من المكسيك ودول أمريكا اللاتينية، بمناسبة المهاجرين لازم تعرف أنك طول ما انت مابتعملش مشاكل فمحدش من الشرطة بيسأل حد هنا عن انه دخل أمريكا ازاي أو إذا كان كاسر فيزته ولا لأ، وحتى لو الشرطة وقفتك لسبب ما، غالباً هتستفسر منك عن الشيء اللي عايزة تسألك عنه وبعدين تمشيك حتى لو انت معاكش ورق بس ماتكونش عامل طبعاً مصيبة كبيرة

15- تاني بفكرك إنك لازم تنسى غالبية الحاجات اللي سمعتها عن أمريكا زمان، مفيهاش هنا إضطهاد للمسلمين بمعنى كلمة إضطهاد لكن فيه بعض الممارسات العنصرية بشكل فردي والحكومة بتحاول القضاء عليها، لكن على العكس حرية التجمع للمسلمين موجودة وحرية التظاهر وحرية أداء العبادات ” حتى فى الشوارع ” وطبعاً حرية بناء المساجد، ده طبعاً بعيداً عن الإستثناءات اللي زي بعض الأمريكان السطحيين اللي ما يعرفوش اي معلومات عن الإسلام فبيعتبروه خطر عليهم وخلاص

16- كل شيء في أمريكا قائم على الكريدت هيستوري اللي هو تاريخك في الاقتراض من البنوك والسداد بطريقة منتظمة ودون تأخير، لو اتأخرت مرة أو اتنين أو تلاتة حياتك كلها ممكن تقف وماتقدرش تأجر بيت أو سيارة أو تشتري أي شيء بالتقسيط، طيب الأفضل تعمل إيه، يبقى معاك كارت ديبت تصرف منه على قد فلوسك وفي نفس الوقت معاك كارت أو اتنين كريدت تشتري بيهم حاجات بسيطة أو حتى حاجات غالية بس تبقى متأكد أنك هتقدر تسددها قبل موعد الإستحقاق بتاعها، علشان تبني بيها تاريخ وفي نفس الوقت ماتقعش في شبهة الربا

17- الرعاية الطبية والصحية هنا حق للجميع، وبتبقى مجاناً لمن يقل دخله السنوي عن 80 ألف دولار في السنة ” بالنسبة لنيويورك مثلاً “، وكل ما معدل الدخل يقل ما تدفعش حاجة خالص وكل ما يزيد تشارك بالدفع لنسبة من مصاريف رعايتك الصحية، لو بتكسب فوق الـ 80 ألف دولار سنوياً هتضطر تدفع تكاليف رعايتك الصحية بالكامل، ولأن أمريكا إتحاد فيدرالي بالأساس فالموضوع بيختلف من ولاية للتانية وطبعاً فيه ولايات بتلزمك تدفع تكاليفك بالكامل وفيه ولايات تانية بتخلي الرقم بتاع متوسط الدخل السنوي اللي هتشارك في مصاريف رعايتك الطبية لو اتخطيته حوالي 25 ألف دولار، كمان نظام ” أوباما كير ” للتأمين الصحي هيخلي أغلب الناس اللي معندهاش تأمين تشترك بالفعل مع شركات للتأمين الصحي تبع برنامج ” أوباما كير ”

18- الأطفال هنا وصحتهم وسلامتهم خط أحمر، الإهتمام بيهم يفوق الوصف والحرص على مستقبلهم شيء مغروس في قلب الأمة

19- الحياة هنا بشكل عام لطيفة ورخيصة لأنها متناسبة جداً مع متوسط الأجور ومعدل دخل الأُسر السنوي، ومع ذلك فيه معارك قانونية سنوياً لرفع أجور ساعات العمل، لأن العمل هنا بالساعة وبيختلف في قيمته من ولاية لولاية .

اضف تعليق للنشر فورا